Exo 25 | TVK | STEP | Iahova biteni mi Mosis bit,

Exodus 25

Hi Misemae ni Mosis Tengan Vapol ni Nim Tavolin Nan

Eksodas 25:1-2, 8-22; 28:1-3

1 Iahova biteni mi Mosis bit, 2 “Uhiteni mi mol-Isrel xil lipol ni sanien tova imei minou tengan vatutou ni polien te Nim Tavolin navan. Umae ni holesok xil vus xa moletin xil iexil bei tengan lisa ni minou.

8 “Moletin xil lipol ni nim tavolin tova xa ihe ut xa inou nikila ha nita en sangas visal xil. 9 Lipol ni nim tavolin ak e holesok xil vus xa iti en ihusil nenemien xa inou nipisen ni minuk. 10 Xil lipol ni bokis tei ni vatit akasia xa imak: teviei teni, sentamita nen ihe handred tei e he xalu mun (110 cm); ien, sentamita nen ihe hanutap lu e hat mun (44 cm); e ngan xa ihe nesao, sentamita nen xa ihe hanutap lu e hat mun (44 cm). 11 Lihas xol vangit bokis ak itel serin xil mun ni gol, e lipilas xole mun ni stirap xil xa lihe gol. 12 Lipol ni von talxatien teni ni gol e livar xati iti len xil xa ihe hat (4), lu iti rin tei, e lu mun iti rin sav. 13 Lipol ni liei lu ni vatit akasia tengan lipo bokis ak ni, e lihas xol xalu ni gol. 14 Ti, lisingin ni ihe von talxatien teni xa di rin xalu vus te bokis ak. 15 Liei te poen xalu ak laliti e von talxatien kestang, linaleh rati ti mun. 16 Ti, hat xalu xa nitis rae xil iti en xa nisa ni minuk, xouk uling xalu laliti e vangit bokis ak.

17 E led nen, ^{▼▼25:17 Led nen, his tei mun teni be 'von esaeen'. Led ak nggoni von xeihen xa Hi di dotan en nggoni suv toto na moletin nan xil, e di pisen esaeen nan mi xil.} xil lipol ni ni gol, teviei teni, sentamita nen ihe handred tei e he xalu mun (110 cm), e ien, sentamita nen ihe hanutap lu e hat mun (44 cm). 18 Ti, lipol ni masxaxa lu xa lakesi ni 'serib'. Lipol ni xalu imak: liti gol ni hama ha vuma ... valnaoxalu istal. 19 Lihisten xalu itel lid nen, tei itotan ite rin tei, e tei mun ite rin sav. 20 Serib xalu ak, laliti e rin xalu e valnaoxalu iketeh ihe hilaep te led te bokis ak, e lalite momal ni aveouxalu ita xol von esaeen na Hi. 21 Hat xalu xa nitis en, uling xalu laliti vangit bokis e uvoh xol kuhi. 22 E hilaep te serib xalu ak, inou nite von esaeen e nihisu minuk en. Ixo rute ak, nisa rae navan xil vus minuk xa xouk ha uhit mesen ni mi mol-Isrel xil.”

Hi biteni mi Mosis tengan ipol ni vet tei xa ti liling holesok xil liti en, pesin tei xa litin vokon en, e laet tei xa meten lu e he sav (7) xa upang ti ipili en. Di, bit kil suse xa lipol ni Nim Tavolin nan ixo en mi Mosis. Xi biteni xa limu xoteh vangit nim ihe rin lu, tengan tei xalu ihe ut eo xa Iahova mikila ita en. Di, biteni mun bit lipol ni vioh tei ikapis xol nim tavolin ak, e sangas visal nim ak, lipol ni hor te sanien tei ni vatit akasia, e lihas xole ni aean brons tengan likila litin vongoro xil en xa ihe sanien eo nae mi Hi. E sangas visali, Hi bit lipol ni pesin tei xa mahulong tengan ti likas he xil en.